អភិបាលខេត្តកណ្តាល ណែនាំដល់សមត្ថកិច្ចពាក់ព័ន្ធដែលឈរជើងនៅតាមច្រកព្រំដែននីមួយៗ ត្រូវយកចិត្តទុកដាក់ទប់ស្កាត់ និងមិនអនុញ្ញាតិអោយប្រជាពលរដ្ឋ នៃប្រទេសទាំង២(កម្ពុជា-វៀតណាម)ធ្វើដំណើរឆ្លងកាត់ ក្នុងគោលបំណងទប់ស្កាត់ការរីចរាលដាលជំងឺកូវីដ១៩ (COVID-19)
20-March-2020 | ដោយ ពលមនសិការ
កណ្តាល៖ នៅរសៀលថ្ងៃទី២០ ខែមីនា ឆ្នាំ២០២០នេះ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល ដឹកនាំកិច្ចប្រជុំគណៈកម្មការ និងត្រួតពិនិត្យដើម្បីប្រយុទ្ធនឹងជំងឺកូវីដ១៩ (COVID-19) និងចាត់វិធានការត្រួតពិនិត្យតាមដានជាប្រចាំច្រកទ្វារព្រំដែន ក្រោមអធិតីភាព។
កិច្ចប្រជុំនេះប្រព្រឹត្តទៅនៅបរិវេនស្នាក់ការគយ និងរដ្ឋាករជ្រៃធំ ស្ថិតក្នុងឃុំសំពៅពូន ស្រុកកោះធំ ដោយមានការពីលោកអភិបាលរងខេត្ត មន្ត្រីរាជការ ប្រធានមន្ទីរពាក់ព័ន្ធ និងកងកម្លាំងប្រដាប់អាវុធ។
បន្ទាប់ពីប្រកាសបិទច្រកព្រំដែនចំនួន០៤ ក្នុងភូមិសាស្ត្រស្រុកលើកដែក និងស្រុកកោះធំ ខេត្តកណ្តាលរួចមក ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល បានណែនាំដល់សមត្ថកិច្ចពាក់ព័ន្ធដែលឈរជើងនៅតាមច្រកព្រំដែននីមួយៗ ត្រូវយកចិត្តទុកដាក់ទប់ស្កាត់ និងមិនអនុញ្ញាតិអោយប្រជាពលរដ្ឋ នៃប្រទេសទាំង២(កម្ពុជា-វៀតណាម)ធ្វើដំណើរឆ្លងកាត់ ក្នុងគោលបំណងទប់ស្កាត់ការរីចរាលដាលជំងឺកូវីដ១៩ (COVID-19)។ ដោយឡែករាល់ការដោះដូរទំនិញនៅអនុញ្ញាតិឲ្យឆ្លងកាត់ជាធម្មតា មិនត្រូវបានបិទនោះទេ ។
សូមបញ្ជាក់ថា ច្រកចំនួន០៤ដែលត្រូវបានបិទ មិនអនុញ្ញាតិអោយប្រជាពលរដ្ឋ នៃប្រទេសទាំង២ធ្វើដំណើរឆ្លងកាត់នោះរួមមាន៖ ទី១-ច្រកទ្វារព្រំដែនអន្តរជាតិក្អមសំណរ ស្ថិតក្នុងស្រុកលើកដែក ទី២-ច្រកទ្វារព្រំដែនអន្តរជាតិជ្រៃធំ ទី៣-ច្រកទ្វារតំបន់ព្រំដែនព្រែកជ្រៃ-ព្រែកទន្លា និងទី៤-ច្រកទ្វារតំបន់ព្រំដែនព្រែកស្បូវ ស្ថិតក្នុងភូមិសាស្ត្រស្រុកកោះធំ ៕
ចំនួនអ្នកទស្សនា
- ថ្ងៃនេះ5131
- ម្សិលមិញ15191
- សប្តាហ៍នេះ48281
- ខែនេះ70161
- ឆ្នាំនេះ70161
- សរុប20512617